日前 Insta360 响官网释出新机预告，仲有张图有只手指公遮住部新机，一如以往同时有条预告片比大家睇𠻹，睇返佢哋嘅产品线，新机系咩系列嘅後继机都好易估啦！又睇吓条片预告咗啲乜？
睇返 GO 系列嘅推出时间，第一代 GO 系响 2019 年 8 月尾推出，当时 Insta360 将其定位为 Action Cam，预告片仲拍埋 GoPro 嚟比较，事隔两年至 2021 年 3 月，就推出第二代 GO 2，当时预告片系用只手兜住部新机，只见镜头仔部分凸咗出嚟。
计返时间，再隔两年推出 GO 系列新机亦好合理，事关旧年 2022 年 3 月出咗第二代 ONE RS，三个月後又有 ONE RS 1-INCH 360 EDITION，再三个月又有 X3，中间又出咗网络摄影机 Link，之後甚至连手机稳定器 Flow 都出埋，今次都应该轮到第三代嘅 Action Cam GO 3 喇呱。
讲返新机预告，响 Insta360 官网日前就出现新机发布消息，并以「小巧灵动，大有不同」为主题，旁边有张相片，见到运动相机嘅体积不断缩细，最後去到只有手指公嘅大细，而新机亦响手指公顶凸出咗少少，同手指公一样都系圆圆哋，同以往 GO 系列嘅外形十分匹配，你话唔系 GO 3 应该都无乜人信喇。
至於条预告片，头 20 几秒嘅画面中，估计好多都系用新机拍出嚟嘅片段，当中有竉物视觉、运动场面等画面，跟住就出现如官网相片中，以手指公遮住大部分新机嘅画面，最後出现「The Tiny Revolution」字样，同埋预告新机会响 6 月 27 号美国东岸夏令时间 EDT 9:00am 正式发布，即香港时间同日夜晚 9:00pm。
功能方面，估计 GO 3 会追返呢两年嘅主流功能，例如会有 4K 摄录、有更高 frame rates、更深防水效能、更长续航力等，但实际会系点呢？就真系要到时 27 号先知喇，不过家阵可以去 Insta360 官网睇吓预告片先嘅：https://youtu.be/uewOiow1k-Q